58. In Dedicatione Ecclesiae
Cameracensis.

la. Grato solve, plebs fidelis,
Tota, voces, carmina
In hac die, cum de caelis
Clara speras agmina

1b. Aedem sacram contueri
Benignis auspiciis,
Quam laetaris confoveri
Mysticis initiis.

2 a. Pete, lauda, contemplare,
Infer te coelestibus,
Urbem sanctam contestare,
Dignis claram civibus.

2 b. Cernes illic, quam miranda
Civium est unitas,
Amor, quies, pax optanda,
Felix est suavitas.

3 a. Quo superni sponsa regis
Sion sponso fruitur
Et arcanis suae legis
Jugiter imbuitur.

3b. Abest moeror, procul dolor,
Nulla sunt dissidia,
Incolarum unus color,
Votorum concordia.

4 a. Hujus memor civitatis

Templum hoc ingredere
Et profanis abdicatis
Vitae callem sequere.

4 b. Te juvabit Sunanitis

Coeli regem proferens
Et Johannes, praeco mitis,
Christum sibi praeferens.

5 a. Quibus dicata patronis
Domus ista jubilat,
Corde, psalmis rite bonis
Melos dulce personat.

5 b. Summe Deus, poli rector,
Templum, plebem respice,
Pius nobis sis protector,
In coelis nos refice.