Acta Congregationum 801

sese coniunctissime cum Domino vivere. Quae quidem mystica societas et

communitas oratione magis magisque confirmabatur, et maxime quoties ille

precibus incensissimis Eucharistico interesset sacrificio.

Mexicopolim tandem reversus, ingravescentibus doloribus et aerumnis,

tamen renovato mentis ardore maximaque fiducia divinae se commisit provi-

dentiae, meram divinam voluntatem quaerens ac spectans. Ex valetudinario

profectus iacuit in domo principi ac sede praecipua virginum Lasallianarum,

quae piissime illi, ut filias addecet, adsederunt, dum ex vitae huius tenebris

ad sempiternam lucem excessit die 5 mensis Decembris anno 1978.

Percrebrescente vero ipsius sanctitatis fama, Mexicana in ecclesiastica

Curia, a die 2 mensis Augusti anno 1995 ad diem 27 mensis Februarii anno

1999, dioecesana Inquisitio est peracta; quam quidem investigationem haec

ipsa Congregatio de Causis Sanctorum, edito Decreto Kalendis Decembribus

anno 2000, legitime probavit. Praeparata igitur Positione, tralaticio more

inita est disquisitio an Dei Famuli virtutes heroicum gradum attigissent;

de quibus in Peculiari Theologorum Consultorum Congressu die 27 men-

sis Ianuarii anno 2012 actum est. Ceterum praedicti Theologi, quoniam

nonnulla adhuc perscrutanda restabant, die 19 mensis Ianuarii anno 2013,

tota causa de integro pertemptata atque perspecta, prout res postulabat,

iterum convenerunt. Dein propositum est dubium in Ordinaria Sessione,

quae proxime praeterito die 2 mensis Iulii anno 2013 habita est, cui praefui

ego Angelus Cardinalis Amato, in qua cuncti, qui intererant, tum Patres

Cardinales tum Sacrorum Antistites Causis Sanctorum tractandis, ipsius

Famuli Dei virtutes, sive theologales sive cardinales, iisque adnexas, ad

gradum heroicum pervenisse adfirmarunt.

Facta demum de hisce omnibus rebus Summo Pontifici Francisco per

subscriptum Cardinalem Praefectum accurata relatione, Sanctitas Sua, vota

Congregationis de Causis Sanctorum excipiens rataque habens, hodierno die

declaravit: Constare de virtutibus theologalibus Fide, Spe et Caritate tum in

Deum tum in proximum, necnon de cardinalibus Prudentia, Iustitia, Tem-

perantia et Fortitudine, iisque adnexis, in gradu heroico, Servi Dei Bernardi

Philippi (in saec.: Ioannis Fromental Cayroche), Fratris professi Instituti

Fratrum Scholarum Christianarum et Fundatoris Sororum v.d. « Guadalupa-

nas de La Salle », in casu et ad effectum de quo agitur.