Acta Congregationum 799

MEXICANA

Beatificationis et Canonizationis Servi Dei Bernardi Philippi (in saec.: Ioannis

Fromental Cayroche) Fratris Professi Instituti Fratrum Scholarum Christianarum

et Fundatoris Sororum v.d. Guadalupanas De La Salle (1895-1978)

DECRETUM SUPER VIRTUTIBUS

« Proba me, Domine, et tenta me; ure renes meos et cor meum. Quo-

niam misericordia tua ante oculos meos est, et ambulavi in veritate tua »

(Ps 26, 2-3).

Famulus Dei Bernardus Philippus, antea Ioannes Fromental Cayroche, in

veritate Domini, dicente Psalmista, sane ambulavit. Fuit enim simplicitate

clarus et humilitate, qui in conspectu Domini mundo corde et pura mente

aevum agitavit; et dum mortalis huius vitae usura fruitus est, ad summum

perfectionis fastigium totis viribus citatoque gradu contendit.

Hic Servus Dei in pago vulgo Chauvets, dioecesis Mimatensis, in Gal-

lia, impigris catholicisque parentibus die 27 mensis Iunii anno 1895 ortus

est. Institutum Fratrum Scholarum Christianarum anno 1908 ingressus, in

oppido Premià de Mar, haud procul Barcinone, in Hispania, ubi Evangelii

praecones instruebantur ut ad varias gentes mitterentur, sacrum tirocinium

insequenti anno laudabiliter deposuit. Dein die 12 mensis Decembris anno

1912 primis votis rite nuncupatis, Cubam ablegatus est; ibique tredecim an-

nos commoratus perpetuis Deo votis se obstrinxit, qui ceterum christianae

doctrinae institutor renuntiatus ad pueros elementarios piis praeceptionibus

erudiendos omne studium atque omne ingenium contulit.

Inde anno 1925 in Mexicum missus, tum ad docendum tum ad procu-

randa sui Instituti negotia maxime incubuit. Interea, facto periculo in rebus

socialibus administrativisque, probatus est earumque diplomate disciplina-

rum insignitus; deinde etiam iura publici doctoris rite capessivit. Anno

autem 1944 Pium Sodalicium condidit Sororum Lasallianarum a Beatissima

Deipara Guadalupensi, quae in ephebeis, Lasallianis potissimum, operam

darent; nonnullasque idcirco sacras arcessivit virgines quae, cum dira in

catholicum nomen recens exarsisset persecutio, in domicilia sua nondum

potuerant redire, sed tamen aliae coniunctius cum aliis vivere expetebant.