60. In Dedicatione Ecclesiae.

la. Templum cordis explemus,
Nos qui templi recensemus
Praesentis encennia.

1b. Laus vocalis extra sordet,
Si cor intus non concordet
Carens immunditia.

2 a. Constans tabernaculum
Lignis et lapidibus
Ejus est signaculum,
Quod constat fidelibus.

2 b. Mentis receptaculum
Ornemus virtutibus
Ut sit habitaculum
Dei cum hominibus.

3 a. Hoc est templum Dei carum,

Quo dispensat gratiarum

Dona deposcentibus,

3b. Hujus templi fundamentum,
Murus est et complementum,
Qui esse dat omnibus.

4 a. Vide templum Salomonis,
Plus virtutum clarens donis
Quam structurae pretio,

4b. Hic exaudit Deus justos,
Arcet lupos gregis custos
Ab hoc domicilio.

5 a. Jesu, noster salutaris,
Templi lapis angularis,
Discordes confoedera,

5 b. Qui das templo sanctitatem
Nos per vitae puritatem
Perducas ad supera.