62. In Susceptione Reliquiarum.

la. Ad honorem summi regis

Excitetur nostri gregis

Jucunda laudatio,

1b. Surge, surge, plebs devota,

Redde Deo nova vota,

Civitas Suessio.

2 a. Christus quondam te Crispino

Decoravit et Rufino

Cum amborum fratribus,

2 b. Novos patres mittens rursum,

Reparare tuae cursum

Vitae suis precibus.

3 a. Sanctis semper grates age,

Qui te prima sua strage

Erexerunt in compage

Corporis ecclesiae.

3b. Factam extra sortem mortis

Te consortem suae sortis

Adduxerunt vitae portis

Et ad portum gratiae.

4 a. Venerare voto pari

Patres, per quos visitari

Te recenter conspicis,

4 b. Ipsos voce si commendas

Et si mentis mundes mendas,

Dulce carmen conficis.

5 a. Venerare lignum crucis

Veterisque virgam ducis,

Insignem miraculis,

5 b. Haec in mari viam stravit,

Illud novis demonstravit

Viam vitae populis.

6 a. Virga vetus signis splendet,

Sed te nova totum pendet

Salutis negotium ;

6 b. Quidquid illa signis signat,

Haec exponit et assignat

Signorum mysterium.

7 a. His duobus fulta signis

Et signis insignibus

Insignitur urbs insignis,

Nullis impar urbibus.

7 b. Huc accedit, quod sanctorum

Praedita reliquiis

Romanorum et Graccorum

Se confert ecclesiis.

8 a. Petro suo Roma gaudet,

Sed nec nostra minus audet

Gaudere Suessio;

8 b. Gaudet enim tui, Christe,

Praecursoris et baptistae

Capite cum brachio.

9 a. Paulo suo gaudet Roma,

Ista suo gaudet Thoma,

Cujus fulget vertice ;

9 b. Sed gaudendum plus est ei

Pro digito nostrae spei

Et salutis indice.

10 a. Piae vocis organum

Sanctum sonet Stephanum,

Primus qui per clibanum

Passionis transiit.

10 b. Martyr tanto clarior

Et in regno celsior,

Quo post suum proprior

Regem miles abiit.

11a. Veneremur et Thaddaeum,

Per quem nobis apud Deum

Grandis est fiducia,

11b. Et te, Marce, teque, Blavi,

Prosequamur cum suavi

Vocum consonantia.

12 a. Nostri servant coenobitae

Caput Areopagitae,

Qui adeptus lumen vitae

Per doctorem gentium

12 b. Et rimatus coeli vias

Erudivit mentes pias,

Cum distinxit hierarchias

Supernorum civium.

13 a. Decus implet laudis hujus

Virgo mater, partus cujus

Jucundavit saeculum,

13 b. Cujus peplo gloriamur,

Cujus laeti veneramur

Calceum, lac, cingulum.

14 a. Gratulare tantis bonis,

Tota plebs Suessionis,

Dona domni Nivellonis

Servans cum laetitia.

14 b. Pro mercede tanti dati

Die cursus consummati

Memoretur memorati

Praesulis ecclesia.

15 a. In hoc simus ei grati,

Quod divinae pietati,

Supplicemus seduli,

15 b. Ut eum suo pastor grege

Cum pastorum vivat rege

In saeculum saeculi.

16. Amen dicant singuli.