80. In Nativitate BMV.

la. Ave, clara stella maris,
In lucem mundi probaris
Exorta divinitus,

1 b. Euge tuae claritatis
Lux umbrosae vetustatis
Patrum fugat gemitus.

2 a. In ortu tuo jucundo
Toti fuit orta mundo
Salus et salvatio,

2 b. Per te namque, virgo pia,
Humanae sortis, Maria,
Datur reparatio.

3 a. O felix tu coeli porta,

Semper clausa, per quam orta
Vera lux apparuit,

3 b. Cujus lucis venustate

Nostrae noctis obumbratae
Caligo disparuit.

4 a. Hujus, virgo, jubar lucis
In hunc orbem introducis
Carnis tectum vestibus:

4 b. O quam digna venerari,
Ad quam lux haec humanari
Venit de coelestibus.

5 a. Haec est stella matutina,
Solis radio vicina,
Ex qua sol justitiae,

5 b. Christus Deus noster, ortus
Est, quo sternitur distortus
Serpens, dux nequitiae.

6 a. O miranda genitura,
Qua mutatur hic natura,
Patrem gignis filia ;

6 b. Tu matris gaudes honore,
Virginali fulgens flore,
Patrem gignis filia.

7 a. Sed qui vim dedit naturae,
Hanc suae virtutis jure
Immutare potuit,

7b. Dispositione dia
Tibi, genitrix Maria,
Virtus baec innotuit.

8 a. Eja, mater, te colentes,
Piis votis te poscentes
Pio vultu respice;

8b. Ne nos hostis castitatis

Trahat ad se cum damnatis,
Casta mater, prospice.