84. In Annuntiatione BMV.

1. Ave, mater Domini,
Per quam salus homini
Datur et concordia,

2 a. Per te venit gaudium,
Reparatrix omnium,
Sis nobis propitia.

2 b. Tibi dixit nuntius,
Pacis nostrae conscius:
Ave plena gratia,

3 a. Statim tecum Dominus,
Fecundans cominus,
Viri semper nescia.

3 b. Totus in te clauditur,
Per quem totum regitur
Divina potentia.

4 a. Signa per eximia
Rex, qui fecit omnia,
Nascitur de filia.
Concinunt coelestia.

4 b. Caritate nimia

Fit pro nobis hostia,
Sternitur superbia
Crucis per compendia.

5 a. Auctor vitae gustans mortem

Jure tali perdens fortem

Surgit cum victoria,

5 b. Nos in luctu, nos in fluctu
Tanto fructu, tali ductu
Ducimur ad gaudia.

6 a. Hac sophia,
Virgo pia,
O Maria,
Vitae via,

Nostra manes gloria.

6 b. Mater ducis,
Porta lucis,
Signo crucis
Nos conducis
Ad coeli palatia.

7 a. Plena favis,

Dans spem pravis,

Coeli clavis,

Vitae navis,

Hujus mundi naufragia
Pertransimus te praevia.

7 b. Coelo clara,
Terris cara,
Regni scala,
Pellens mala,
Tu flos, tu ros, tu venia,
O fons, os, pons, mons, gratia.

8 a. Panis cella
Fundens mella,
Maris stella
Sedans bella,
Plenus hortus,
Laetus portus,
Nos Deo concilia.

8 b. O praedicta
Benedicta,
Templum Dei,
Pignus spei,
Fac nos puros
Ac securos

Per laeta, per tristia.

9. Te mediante, pia,
Simus ut in patria,
Ubi gaudent omnia.