89. In Annuntiatione BMV.

1. Cuncti unanimiter
Concinamus suaviter

2 a. Salutis auctori

Benigno ac redemptori

2 b. Universorumque
Optimo moderatori,

3 a. Qui nostrae saluti providens
Dignatus est descendere

3 b. Empyreis a sedilibus

Et carnem nostram assumere

4 a. Ex Maria virgine,
Quae pudicissima
Mansit illaeso hymine.

4 b. Sine viri semine
Natum protulit
Sacro afflata spiramine,

5 a. Dum Gabriel archangelus,
A Deo missus,
attulit verba dulcia:

5 b. Ave, inquit, sanctissima
Virgo Maria,
Plena divina gratia.

6 a. En tuo in utero

Concipies prolem divam,
Virgo manens paries,
Illi daturus
Est dominus Deus
Sedem David, patris ejus.

6 b. Verbis dum virgo
Credidit angelicis,
Concipit filium Dei,
Qui genus humanum
A nece saeva
Eripuit morte sua.

7. Ergo nunc gratias
Agamus singuli
Maximas redemptori.