116. De beata Maria V.

la. Auster, veni, perfla mentem
Et accende torpescentem
Aquilonis frigore,

1b. Surge, torpor aquilonis,
Novo rore, novis donis
Fecundato pectore.

2 a. Lingua torpens relaxetur
Et in laudem excitetur
Venerandae virginis,

2 b. Ut laus digna detur ei,

Quae non tantum mater Dei
Sed Dei et hominis.

3 a. Inter matres nulla talis,
Quam character virginalis
Nec post partum deserit,

3 b. Virgines mirentur matrem
Virginem, quae prolis patrem
Virum non cognoverit.

4 a. Admiremur et nos mundam
Genitricem, sed fecundam
Veneremur virginem,

4 b. Mundam a contactu viri.
In qua constat couniri
Verbo patris hominem.

5 a. Ergo, virgo mater Dei,
In qua summa nostrae spei
Consistit et veniae,

5 b. Regem nostrum, tuum natum,
Redde nobis hic placatum
Nos reformans gratiae.

6 a. Ut, qui consors nostrae sortis
In cruce pro nobis mortis
Pertulit angustias,

6b. Suae nobis deitatis
Et aeternae claritatis
Conferat delicias.