118. De beata Maria V.

la. Stella maris luminosa,
Virga florens et frondosa,
Quam rigavit copiosa
Deitatis gratia,

1b. Ex regum stirpe formosa
Orta fulget generosa
Virgo prudens et formosa,
Trinitatis gloria.

2 a. Ab aeterno ordinata,
Mente patris occultata,
Multis signis figurata
Mira providentia.

2b. Nunquam fuit maculata
Sed sancta priusquam nata
Et ab angelis servata
Magna diligentia.

3 a. Sunt impleta vota grata,
Dum in templo est oblata
Jugiterque mancipata
Divino servitio.

3 b. In aetate designata
Voce coelitus delata
Casto Joseph fit sponsata
Stupendo indicio.

4 a. Salvatorem generavit,
Unde justus vir expavit,
Sciens, quod non reservavit
Virginalem clausulam.

4 b. Bene tamen reservavit
Arcanum nec divulgavit,
Sponsam sed magnificavit
Tantae prolis gerulam.

5 a. O Maria, singularis

Mater, thori expers maris,
Verum Deum laeta paris
Pariter et hominem.

5 b. Hinc bpata praedicaris
Et a cunctis veneraris
Super summumque locaris
Seraphicum ordinem.

6 a. Gloriosa imperatrix,
Tu es nostra mediatrix,
Divinorum dispensatrix
Bonorum largissima.

6 b. Tu reorum excusatrix,
Miserorum consolatrix,
In agone confortatrix
Et spes es certissima.

7 a. Ergo dulcis et benigna,
Omni semper laude digna,
Tuo nato nos consigna
Pia per suffragia.

7 b. Ut carnali, qua gravamur,
Compede sic absolvamur,
Ut soluti transferamur
Ad coeli palatia.