130. De beata Maria V.

1. Ave, stella matutina,
Plena gratia divina.

2 a. Ave, sponsa grata Deo,
Tecum Deus, tu cum eo.

2 b. Benedicta parens Christi,
Virgo Deum peperisti.

3 a. Gaude, felix et beata
Sponsa Deo consecrata,
Virgo verbo gravidata,
Sed non gravis aut gravata.

3 b. Gaude, virgo mater Christi,
Quae non nupta concepisti,
Non corrupta peperisti,
Illibata permansisti.

4 a. Verbo patris inspirata,
Tu rubus es inflamata,
Quasi vellus irrorata,
Quasi tellus instillata.

4 b. Nulla prior nec secunda
Tali prole nec fecunda,
Nulla certe sic intacta
Sine viro mater facta.

5 a. Ergo sponsa specialis,
Cui nulla coaequalis,
Fac nos licet inaequales
Sponso tuo consodalesi

5 b. Sponsa tota laetabunda,
Tota pulchra, clara, munda,
Fac nos claros et pudicos,

Sponso caros et amicos.

6 a. Fac nos quamvis peccatores
Sponsi tecum sectatores,
Fac nos tuos laudatores
Sponsi tecum amatores.

6 b. Sponso tecum occurrentes
Tamquam virgines prudentes,
Una sponsa tecum simus
Uni sponso, quem sitimus.

7 a. Una simus uxor agni,
Una sponsa regis magni.
Una Rachel sive Lia,
Una Martha seu Maria.

7 b. Sponsae cultum aemulantes,
Sponsi vultum speculantes,
Sponsae cultu sociemur.
Sponsi vultu satiemur.