137. De beata Maria V.

1 a. Ave, mater genitoris.
Via vitae, vas decoris,
Lilium munditiae,

1b. Stella maris, sol splendoris,

Veri virgultum amoris.

Paradisus gratiae.

2 a. Ardet rubus caritatis,
Puritas non laeditur,
Dum limus humanitatis
Deitati jungitur.

2b. Vellus rore pietatis

Perfusum nunc cernitur,
Partus mirae novitatis
Ex Maria nascitur.

3 a. Kenovatur creatura
Mente, factori factura,
Miratur rerum natura,
Virga floret regia.

3 b. O miranda celatura,

Mater manens virgo pura,
Deus homo, legis jura
Pandis singularia.

4 a. Fons misericordiae,
Rosa claritatis,
Aurora laetitiae,
Manna sanitatis,

4 b. Da pigmenta gratiae,
Cella sanctitatis,
Portans sceptra gloriae,
Templum trinitatis.

5 a. Summis donis decorata,
Super coelos sublimata
Sanctorum rosario,

5 b. Virgo Deo dedicata,
Duc nos ad regna beata
Cum dilecto filio.