143. De beata Maria V.

1. Verbi Dei parens alma,
Virgo plena gratia,
Aula regis, sancta regum
Adornans palatia.

2 a. Per te patet porta coeli,

Cherubim quam clauserat.

2 b. Hominemque natus ex te
Deus Deo foederat

3 a. Sic clara patriacharum
Efficis oracula,

3 b. Et obscura prophetarum
Detegis miracula.

4 a. Gedeonis

siccatur area,

4b. Madet vellus

carne virginea.

5 a. Nova nativitas

pandit mysteria,

5 b. Jam laudes debitas
Reddat ecclesia.

6 a. Rubus non comburitur,
Tua nec consumitur
In carne virginitas ;

6 b. Unda sancti spiritus
Rorat te divinitus
Et manet virginitas.

7 a. Virgo virginibus
Praecellens omnibus,
Depellens scandala,

7 b. Fructu praecipuum
Paris amygdalum
Inter amygdala.

8 a. Femina Ruth Moabitis,
Ferax tellus verae vitis,
Viro Booz conjugata,

8b. Forma facta est virtutis,
Virum germinans salutis,
De qua stirps est Jesse nata.

9 a. Quam felix clementia,
Quod ejus es filia ;

9 b. Peccatores gaudeant
Et te matrem adeant.

10 a. Omnes illumina,
Coelorum Domina,

10 b. Nosque, propitia,
Sic reconcilia,

11a. Ut Thamar filium
Judae parturiat,

11b. Qui nos a vitiis
Dividi faciat.

12 a. Te Salomonis fabrica
Nube figurat mystica,
Quam lux coclestis reserat,

12b. In illa domo mallei
Non sonuerant aerei,
Nec te lex viri noverat.

18 a. Sine tactu carne sana
Absque manu est humana

13 b. Lapis caesus ex te, pura,
Quem mons signat in figura.

14 a. Virum virgineo
Circumdans utero,
O virgo femina,

14 b. Et vir et Deus est,
Qui natus tuus est
Natura gemina.

15 a. Regem Emanuel
Nuntiat Gabriel,
Quod nasci debeat
Nec pudor pereat.

15 b. Ortus in Bethlehem
Rex est Jerusalem,
Quem, proles regia,
Paris cum gloria.

16 a. Quem canunt angeli,
Coelestes nuntii,
Et pacem perditam
Homini redditam.

16 b. Ergo virgineos

Huc vertens oculos
Dele facinora
Et tuos robora.

17. Ut nos ad regales, virgo, nuptias
Introduci cum redemptis facias.