154. De sancto Adriano.

1. Laetis tange fidibus,
Laeta instant gaudia,
Laeta reddunt omnia,

2 a. Praesens turba, meritis
Tanti plaude martyris
Jucunda melodia.

2 b. Voce bene consona
Vita reddat pneumata
Deo placabilia.

3 a. Gaudet martyr in poena,
Sua spe Deo plena
Irridet supplicia.

3 b. Judex fremit impius,
Spumat, saevit acrius,
Martyr suffert omnia.

4a. Tandem crurifragio
Expleto martyrio
Ad coeli fastigia
Felix volat anima.

4 b. Coeli gaudet chorea
Hoc adaucta collega,
Tellus laeta jubilat,
Dum martyr tripudiat.

5 a. Hinc jubetur,
Ut cremetur
Corpus igne,
Sed insigne

Mox claret miraculum:

5 b. Ignis cedit
Neque laedit,
Sed et venti
Turbulenti

Urbis vertunt moenia.

6a. Hujus laetus
Noster coetus,
Ut salvetur,
Imitetur

Rubea vestigia.

6 b. In his festis
Monstret gestis,
Quem honoret,
Et exoret

Ejus patrocinia.

7 a. Adriane, martyr Christi,
Hoc inane contempsisti,
Tuae servos ecclesiae
Irriga rore gratiae.

7 b. Christum regem nobis placa,
Tuo gregi semper paca,
Tuae custos ecclesiae
Sis et largitor veniae.

8 a. Adriane, pater care,
Deprecare, ut hoc mare
Impugnare
Tam amare

Jam cesset ecclesiam ;

8 b. Ut fons ille pietatis,
Qui te lavit a peccatis,
Donet laetam
Et quietam

Pacis temperantiam.

9. Hoc det ejus gratia,
Qui regnat per saecula.