159. De sancta Agnete.

la. Agnetis solemnio
Ferveat devotio,
Dies digna gaudio,
Psallat chorus.

1b. Pudoris commercio
Nubit rosa lilio,
Agnes agno socio,
Felix thorus.

2 a. Agnes digne dicitur,
Quae sic agno jungitur,
Quod donis non flectitur
Nec tormentis.

2 b. Amans dum contemnitur,
Furit, lecto sternitur,
A medicis proditur
Amor mentis.

3 a. Rapta veste tegitur
Capillis, post ducitur
Ad lupanar, spargitur
Coeli luce.

3 b. Coelo vestis mittitur,
Angelus obsequitur,
Interit, qui ducitur
Mortis duce.

4a. Illo vitae reddito
Flammis data subito
Servatur, sed merito
Gens crematur.

4 b. Post necatur gladio,
Virginum consortio
Agno dextra socio
Demonstratur.

5 a. O dulcis agnicula,
O placens juvencula,
Fac nos sine macula
Pertransire.

5 b. Lapsa vitae morula
Fac ad agni fercula
Summa tabernacula
Introire.