167. De sancto Anatolio.

1 a. Decantemus hodie

In choro cum tympano

1b. Canticum laetitiae

Cum choris et organo.

2 a. Ad beati confessoris
Curramus subsidium,

2 b. Veneremur cunctis horis
Sanctum Anatolium.

3 a. Hunc qui sanctum veneratur
Cum firma fiducia,

3 b. Vere sibi vera datur
A Domino gratia.

4 a. Qui muto, claudo pariter
Per Dei clementiam

4b. Reddidisti verbum, iter,
Hanc audi familiam.

5 a. O qui manus mulieris
Adhaerentes brachiis

5 b. Sanavisti, tu lauderis
Piorum praeconiis.

6 a. Ergo sancto jubilemus
Pellentes segnitiem,

6b. Ut per ipsum impetremus
Paradisi requiem.

7 a. Funde preces, Anatoli,

Pro nobis ad Dominum,

7 b. Regem terrae, Deum poli,
Verum lumen luminum.

8 a. Qui dignetur misereri
Peccatorum populi

8 b. Et clementer intueri
Nos in fine saeculi.