173. De sancto Antonio.

la. Laus solemnis, laus devota
Novum nova spe promota
Sustollat Antonium,

1b. Virtus vitae, flos signorum,
Lux doctrinae, vis verborum
Laudis sunt praeconium.

2 a. Augustini prius normam,
Post Francisci tenens formam
Spirat ad martyrium,

2 b. Fratrum nota passione
Matri praefert Ulixbonae
Rebelle Marocbium.

3 a. Spe frustratur remanente
Deo secus disponente
Ad salutem omnium,

3b. Martha servit vilitati,
Sed Maria veritati
Dilatat hospitium.

4a. Tu, qui verbo mentes sanas,
Mortem pellis et profanas
Virus infidelium,

4b. Arca dictus testamenti,
Tuum nobis in praesenti
Confer patrocinium.

5. Amen dicant omnia.