182. De sancta Austrelierta.

1. Hodiernum virginis
Festum dignis gaudiis
Recolat ecclesia.

2 a. Hujus diem virginis
Splendor veri luminis
Sua lustrat gratia,

2 b. Quo contemptrix saeculi
Vires fregit zabuli
Potenti victoria.

3 a. Ejus fuit meriti,
Quod velamen capiti
Suo comptum cerneret,

3 b. More dum infantulae
Umbram suae formulae
In aqua conspiceret.

4 a. O beati oculi,
Qui tanti miraculi
Viderunt sublimia
Per Christum prodigia.

4b. Res effectum habuit,

Nam quod umbra docuit,
Est in brevi termino
Consecrata Domino.

5 a. Hanc vir clarus
Audomarus
Informavit
Et sacravit

Dei dignam gratia,

5 b. Quae magnorum
Meritorum
Plena fulsit
Et indulsit

Infirmis solatia.

6 a. O insignis Austreberta,
Margarita es reperta
Nuper in ecclesia,

6 b. Tuam gentem, tuae laudi
Attendentem, clemens audi
Poscens vitae praemia.

7 a. In fornacem te ingressa
Flammae virtus est repressa,
Cum signum crucis faceres
Pannisque prunas tegeres.

7 b. Cujus oram vestimenti
Vis non ussit elementi,
A fornace infera
Nos tua prece libera.

8 a. O beata, o benigna,
Austreberta, laude digna,
Apud regem
Christum gregem
Nostrum reconcilia,

8 b. Ut patrona te confisi
Ad amoena paradisi
Scala precum
Intrent tecum

Longa post exsilia.