183. De sancto Austregiselo.

1. Plebs fidelis conciue
Cum jucundo carmine
Laudes Austregisili,

2 a. Pulsa cordis tympanum,

Sonet vocis organum

Viro venerabili,

2 b. Ecce, gemma militum
Scandit aulam coelitum
Cum triumpho nobili.

3 a. Commutavit gloriam
Linquens transitoriam
Pro incommutabili,

3b. Debellavit vitium
Mentis aediiicium

Petra fundens stabili.

4 a. O thesaurum numinis,

Quem nec splendor sanguinis
Nec parentum monitus
Trahunt ad concubitus.

4b. Amor temporalium
Suadet conjugium,

Sed transit in spiritum
Caro perdens debitum.

5 a. Regem linquit
Nec delinquit,
Discit legem
Et ad regem

Regendum eligitur.

5b. Mulcet, terret,
Ne quis erret,
Non in sola
Frangit mola

Et utraque frangitur.

6 a. O praeclare,
Nos dignare
Et exaudi
Tuae laudi
Congregatos hodie.

6 b. Tu beatus
Advocatus
Et medela
Contra tela
Latentis perfidiae.

7 a. Per te quidem vidit caecus
Et sessorem sternit equus,
Dum spiritu nequitiae
Cingit ensem militiae.

7 b. Urbem solvis a tributo,
Perit praeses cive tuto
Et vincitur egregie
Mentis incoeptum regiae.

8 a. O corona sacerdotum,
Sidus inter astra notum,
Preces fundis
Et immundis

Imperas spiritibus.

8 b. Illos ergo procul pelle,

Fac nos solum Christum velle,
Sumus tui,
Fac nos frui
Praemiis coelestibus.

9. Hoc det ejus gratia,
Qui regnat per omnia
Saecula.