189. De sancto Bernhardo.

la. Ut devote compleatur,

Quod psalmistae vox hortatur,
Laus in sanctis persolvatur
Sanctorum opifici;

1b. Nam in coelis coronavit,
Quos in terris consecravit,
Quorum cursum consummavit
Triumpho multiplici.

2 a. Bona nempe studeamus
Beatorum, quos amamus,
Imitari studia,

2 b. Quibus Deo floruerunt

Et transire meruerunt

Ad aeterna gaudia.

3 a. Ex illis sanctus Bernhardus
Tamquam pretiosa nardus
Redolet collegio,

3b. Gloria miraculorum
Et splendore meritorum
Rutilans egregio.

4 a. Crucifixit sibi mundum,
Ut se puram atque mundum
Servaret a vitiis:

4 b. Totum Deo se dicavit
Et se ipbum victimavit
Jugibus martyriis.

5 a. Ante prophetatus
Quam fuisset natus.
Quis futurus fieret,

5 b. Post effulsit talis.
Ut a viis malis

Plurimos converteret.

6 a. Zelantem ob res divinas
Contra pestes leoninas
Et monstra schismatica

6 b. Istum sensit salutarem
Et columnam singularem
Sedes apostolica.

7 a. Sic tyrannos refraenavit,
Inimicos complacavit,
Delevit discordias,

7 b. Hydros trivit emergentes,
Vulsit haereses recentes.
Peremit blasphemias.

8 a. Christi verbum seminabat
Regnis et provinciis.
Quod ubique roborabat
Signis et prodigiis.

8 b. Novis orbem adornabat
Late monasteriis
Et supernis corruscabat
Saepe vaticiniis.

9 a. Martham quidem atque Liam
Sanctis complens actibus
Plus Rachelem et Mariam
Fovit mentis viribus.

9 b. Dum pro causis cogebatur
Tis exire gravibus,
Jugiter sigillabatur

Cor sub claustri legibus.

10 a. Charismatibus politae

Tamquam vero coenobitae
Fuit ei tenor vitae
Virtutum perfectio

10b. Semper sese deprimebat
Summos gradus fugiebat,
Ampla quem tot eligebat
Urbium devotio.

11a. Lux tractandi tam sublimis
Hunc implevit coelitus,
Quod sic orthodoxis primis
Adaequatur inclitus.

11b. Regularem parans callem
Salvatoris gregibus
Claram suam fecit vallem
Viis spiritalibus.

12a. Flos famae, facundiae.
Morum, stirpis, gratiae,
Formae, sapientiae
Sanctum illustrabat

12b. Abbas in officiis
Vigil in custodiis
Crebris beneficiis
Multos hilarabat.

13 a. O sacer athleta Christi,
Quos in Christo genuisti,
Quo beatus introisti,
Perduc ad palatium

13 b. Et ecclesiae totius
Filiis succurre pius,
Ut his Christus, rex illius,
Det coeleste praemium.