191. De sancto Bertrando.

la. Sacri festa confessoris
Recolamus et canoris
Exsultemus modulis,

1b. Gratulemur mente pura
Prosequentes cordis thura
Labiorum titulis.

2 a. Digne decet venerari,
Digne dignum praeconari
Virtutis signiferum,

2b. Cujus fulsit insignita
Documentis sanctis vita
Verborum et operum.

3 a. Homo verus, homo purus,
Mundo blandus, sibi durus,
Carnis calcans lubricum,

3 b. Contra carnem dimicavit
Et se totum transformavit
In statum angelicum.

4a. Vicit carnem, vicit mundum,
Vicit fortem et immundum
Hostem Adae veteris,

4 b. Ex his tribus conculcatis
Summae cultor trinitatis
Conregnat cum superis.

5 a. Hospes terrae, civis poli,
Se subducens carnis moli
Sequens spiritalia,

5 b. Dum a carne se suspendit,
Supra carnem comprehendit
Angelorum gaudia.

6 a. Ubi totus mente tota,
Non impulsus mundi rota
Sed spe firma stabilis,

6 b. Christi leve tulit onus,
Pastor lenis, pastor bonus,
Pias, prudens, humilis.

7 a. Lignum frondens, vitis viva

Palma florens et oliva

Gratiae fructifera,

7 b. Fructum dedit Deo gratum
Et transcendit orbis statum
Cedrus odorifera.

8 a. Se praecingens castitate
Cum lucernae claritate
Vigil in excubiis

8 b. Pernoctavit exspectando
Nuptialem sponsum, quando
Rediret a nuptiis.

9 a. Supra petrae firmamentum
Domum struxit et talentum
Duplicatum reddidit,

9b. Servus prudens et fidelis
Non in terra sed in caelis
Talentum recondidit.

10 a. Hic ad pauca constitutus
Ibi gaudet assecutus
Infinita milia,

10 b. Hic dispergit, ibi legit,
Hic decessit, ibi degit
Immortali gloria.

11a. Cui finis infinitam

Dedit lucem, dedit vitam
Et perenne gaudium,

11b. O Bertrande, pastor bone,
Ad coelestis nos coronae
Introducas bravium.