195. De sancta Caecilia.

la. Exsultemus cum jucundo
Cantu, corde simul mundo
Virginis martyrium:

1b. Victis hoste, carne, mundo
Caecilia de profundo
Scandit ad palatium.

2a. Virgo prudens, exsors sordis,

In arcano semper cordis

Servans evangelium,

2 b. Foris nitens indumentis,
Subtus cultum parans mentis
Gerebat cilicium.

3 a. Cantantibus organistis
Commutare non pro istis
Vult Christi connubium,

3 b. Fructum ventris virginalis
Rogans, ne sponsi carnalis
Sentiat contagium.

4 a. Stupentem Valerianum

Sponsum mittit ad Urbanum,
Praesulem fidelium,

4b. Quem in fide reddit sanum,

Cui Deus et germanum

Sociat Tiburtium.

5 a. Currunt fratres ad certamen,
Cui virgo dat solamen,
Ut vincant supplicium ;

5 b. Cadit corpus, vincunt tamen
Nec pavent mortis gravamen
Propter vitae praemium.

6 a. Sponsa sponso reddens vicem
Feriendam dat cervicem
Neque timet gladium,

6 b. Sponsus sponsam pugnatricem
Introducit in felicem
Thalamum coelestium.

7 a. Caecilia, nos exaudi,
Ut resistas semper fraudi
Nobis adversantium;

7 b. Sancto fine fac nos claudi
Et vacantes tuae laudi
Duc ad regni solium.