202. De sancta Clara.

la. Novae lucis radius
In excelsis oritur,
Sole fulget clarius,
Clare Deo fruitur.

1b. Clara quidem nomine
Sed virtute clarior,
Illustris propagine
Sed gestis illustrior.

2 a. Dum mater pavesceret,
Ne partu deficeret,
Audivit oraculum,

2 b. Quod lumen produceret
Clarum, quod claresceret
Universum saeculum.

3 a. Carnis supercilium
Domans per jejunium
Ab aetate tenera,

3 b. Sub fulgore vestium
Celabat cilicium

Parvipendens prospera.

4 a. Toto mentis studio
Inhaerens vestigio
Virginis Christiferae,

4b. Francisci consilio
Soli Dei filio
Praeelegit vivere.

5 a. Haec Francisci plantula
Se celans in cellula
Dominarum pauperum,

5 b. Mansuram per saecula
Inchoavit primula
Ordinem florigerum.

6 a. In supernis sedibus
Virgo cum virginibus
Clara clare radias,

6 b. Tuis sanctis precibus
Junge coeli civibus
Fratres atque filias.