203. De sancta Clara.

1 a. Inclarescat melodia,
Clara cordis harmonia
Clarae det praeconia,

1b. Concors soli symphonia
Trina poli hierarchia
Depromat tripudia.

2 a. Haec est planta novitatis,
Spinis septa paupertatis,
Rosa pudicitiae,

2 b. Sacco tecta vilitatis,
Fune cincta castitatis,
Gemma poenitentiae.

3 a. Ortum docet virginalem
Concludendo sensualem
Haustum virulentiae,

3 b. Legem ligat sensualem
Per doctrinam spiritalem
Vitae sanctimoniae.

4 a. O quam clare illustratur,
Velut Jacob contemplatur
Spiritus excubias,

4 b. Petrae caput reclinatur,
Humo nuda pernoetatur
Edom ob insidias.

5 a. Quam praeclara signis facta,
Claritatis nomen nacta
Dono parsimoniae,

5 b. Caro menti sic subacta
Vi virtutis dat contracta
Foenus patientiae.

6 a. Ergo, mater pietatis,
Nos illustra claritatis
Bysso novae gratiae,

6 b. Sacco, fnne nuditatis
Cinctos stola novitatis
commutetur gloriae.