210. De sancto Eleutherio.

la. Tornacensis civitas,
Laudes pange debitas,
Est enim solemnitas
Patris Eleutherii:

1 b. Per quem cessit falsitas,
Nam gentes indomitas
Reduxit ad semitas
Divini consilii.

2a. Hunc Serenus genuit,
Blanda mater aluit,
Motus carnis domuit
Et aetatis lubricae.

2 b. Christum puer induit,
Hinc Tornaco praefuit,
Ubi pastor claruit
Praevisus prophetice.

3 a. Dum perfusus coeli rore
Christum orat in fervore
Temptat eum suo more
Satanas per virginem.

3 b. Quae subintrat in furore,
Nacta tempus hujus horae,
Causam morbi pandens ore,
Gestit ad libidinem.

4a. Dum declarat blandimentis
Flammam ignis vehementis,
Mox ad vocem arguentis
Suffocata corruit.

4 b. In excessu sanctus mentis
Orat precibus attentis,
Exauditur vox petentis,
Hanc vitae restituit.

5 a. Verbum vitae sanctus serit,
Infideles plaga ferit,
Pars insanae plebis perit,
Praeconem incarcerat.

5 b. Christus sancti curam gerit,
Nam qui erat, est et erit,
Solvit claustrum, vectes terit
Et pastorem liberat.

6a. In fervore magnae spei
Caecus orat sanctum Dei,
Signo crucis confert ei
Sanitatis gratiam.

6b. Vir infectae speciei
Clamat : miserere mei ;
Mox compassus sanctus rei
Purgat leprae scoriam.

7 a. Dolentes haeretici
Suum dogma dejici,
Sancto plagas ingerunt,

7 b. Morte coepit affici,
Cives adsunt coelici
Spiritumque deferunt.

8 a. Thecla vacat somnio,
Suscitata tertio

Jussum facit publicum ;

8 b. Sancti fit inventio,
Thecla fit de medio
Post sumptum viaticum.

9 a. Per te, pater, tres defuncti
Suscitantur vita functi,
Tornacenses in te cuncti
Respirant pro venia.

9 b. Tua prece sint compuncti
Pro peccatis, intus uncti,
Donec Christo plene juncti
Fruantur in patria.