235. De sancto Fraiicisco.

1 a. Eructetur dulce melos,
Sonus cujus tangat caelos,
Et Francisco jubilet;

1b. Novus Noe hic servatur,
Qui per lignum liberatur
Cum sua familia.

2 a. Alter Abraham revera
Deo credens mente mera
Relinquendo terrea:

2 b. Hic Loth alter comprobatur,
Qui in monte liberatur
Pereunte Sodoma.

3 a. Hic Isaac Deo gratus
Et ad victimam paratus,
Si truncasset gladius ;

3 b. Servus Laban hic fidelis,
Liae prius, post Rachelis
Ditatus connubio.

4 a. Alter filius accrescens
Linquit pallium horrescens
Ad tactum Aegyptiae;

4b. Hic est Moyses mansuetus,
Trahens Hebraeorum coetus
Ab Aegypti tenebris.

5 a. Novus David patriarcha,
Nudus saltans coram arca,
Vilem sese reputans;

5 b. Intus cruci conclavatus,
Foris pedes, manus, latus,
Christi prodit stigmata.

6 a. Multis vitam, caecis visum,
Lepram sanans moestis risum,
Mutis fari, claudis gressum
Hic Franciscus reddidit.

6b. O Francisce, dux minorum,
Vitae norma, dogma morum,
Nos ad culmen angelorum
Tuis trahe meritis.