240. De sancto Gaugerico.

1 a. Gaugerice, gemma cleri,
Dei cultor, doctor veri,
Gregem tuum respice,

1b. Omnes die bodierna
Nos exaudi, nos guberna
Nosque fortes effice.

2 a. Lepra foedum tu mundasti,
Convertisti, baptizasti
Motus vena veniae;

2 b. Per te, Dei sancte prueco,
Restauratur lumen caeco
Manu sapientiae.

3 a. Tu fuisti Dei templum

Per doctrinam et exemplum,
Aromatum area,

3 b. Coeli portas introisti,
Quia Christo reddidisti
Granum sine palea.

4 a. Mundus mundum despexisti
Et vivendo te dedisti
Exemplar munditiae,

4b. A peccatis alienus,

Dum vixisti pater plenus
Dulcoris et gratiae.

5 a. Compeditos tu solvisti
Pia prece, verbo Christi
Devotos inebrians:

5 b. Quos rebelles reperisti,
Sic potentes confudisti,
Reos reconcilians.

6 a. Praesul pronus dum orabat,
Angelica sustentabat
Manus eius baculum:

6b. Plebs cucurrit ad hoc mirum

Et collaudant Dei virum

Cernendo miraculum.

7 a. Quam clamabat fama trita,
Regi placet tua vita
Summe venerabilis,

7 b. Gratiarum propter dona
Ejus viret in corona
Flos immarcessibilis.

8 a. Vir beate, fac placatum
De Maria Christum natum
Nobis peccatoribus,

8 b. Ut in terris te laudantes
Tecum regnent exsultantes
Cum choris coelestibus.