246. De ss. Gervasio et Protasio.

la. Laetabunda vox erumpat,
Fortes nostrae quae disrnmpat;
Nexus conscientiae,

1b. Ex quo mortem operatur
Luctus mundi derivatur
In sono laetitiae.

2 a. Veros testes reverere,
Morte qui perhibuere
Christo testimonium,

2b. Christo regi militantes,
Quos excepit triumphantes
Regnum triumphantium.

3 a. Duplicetur motus mentis,
Doleamus de tormentis
Laeti de victoria,

3 b. Martyrum Gervasii
Simul et Protasii
Colentes solemnia.

4 a, Hos de Dei gratia
Vitalis, Valeria

Duo simul procreant,

4b. Qui pares parentibus
Sponte cum martyribus
Pereunt, ne pereant.

5 a. Ut haereditarium
Mores et martyrium
Ducunt a parentibus,

5 b. Se furantur saeculo,
Quodam in coenaculo
Vacant lectionibus.

6 a. Decem annis degunt ita,
His est Christus cibus, vita
Lux, exemplar, lectio;

6 b. Post haee semet abnegantes
Sed et crucem elevantes
Arrident martyrio.

7 a. Gaudent inter persequentes
Et sic vincunt patientes,
Exaltantur humiles;

7 b, Deo, sibi, mundo justi,
Vivi fide, spe robusti,
Caritate nobiles.

8 a. Iram lupi non abscondunt,
Agnos tondent et contundunt,
Os qui non aperiunt.

8 b. Inimicos corporis,
Qui venantur deforis,
Intra se despiciunt.

9 a. Quem nec sinunt vivere
Nec finiri citius,
Plumbatarum verbere
Vapulat Gervasius.

9 b. Breviori tramite

Currit expeditius
Ad te, Christe, capite
Truncato Protasius.

10 a. Hi sunt grana seminata,
Moriendo quae renata
Fructum reddunt creditum.

10 b. Mors istorum pretiosa,
Vita quorum speciosa
Talem dedit exitum.

11a. In hoc sanctis ministravit
Mundus, quod hos emundavit,
Quos flagellis trituravit
Doloris in area.

11b. Lenis ventus auster flavit,
Trituratos ventilavit,
Ventilatum reportavit
Triticum in horrea.

12 a. Jesu, vivi fons amoris,
Jesu, meta viatoris,
Respiramen luctatoris,
Sors, corona pugnatoris
Et currentis bravium ;

12 b. Constitutos in agone
Nos illustra, Jesu bone,
Ne frustremur spe coronae
Sed fruamur visione
Redemptoris omnium.