267. In Nativitate s. Johannis B.

la. Gaude, Sion laetabunda,
Sit laus Deo, laus jucunda,
Decora laudatio:

1b. Fac auditam vocem laudis,
Audi vocem, fac quod audis,
Fideli obsequio.

2 a. Gratulare, quae non paris,
Solitudo singularis
Filiorum copia,

2 b. Propter ortum magni vatis
Muta vestem vetustatis,
Adornare gloria.

3 a. Praecursore Christi nato
Callem morum complanato,
Para viam Domino:

3 b. Tu lucerna lucis verae,
Claritatem contuere
Lucis sine termino.

4 a. Sustinente plebe foris
Sancti sacrum sanctioris
Zacharias penetrat,

4b. Supplex orat thuris hora
Postulasque potiora
Supra votum impetrat.

5 a. Stupet haerens, mente nutat,

Vix impleri posse putat

Gabrielis nuntium:

5 b. Dum rimatur modum rei,
Non attendit velle Dei,
Rerum causam omnium.

6 a. Fides tarda reddit mutum,
Clara sacri lux virtutum
Praeit ortum pueri ;

6 b. Nova prole veteranus,
Partu novo gaudet anus
In senecta uberi.

7 a. O quam felix puer talis,
Cujus multis fit natalis
Gaudendi materia,

7 b. Meritorum quaeris testem,
Voca vitam, victum, vestem,
Nomen plenum gratia.

8 a. Matris adhuc alvo clausus
Gestu Christo dat applausus
Clauso ventre virginis,

8 b. Matrem replet inspiratus,
Patris linguam solvit natus,
Solvit litem nominis.

9 a. Hic est meta legis datae,
Legis limes breviatae,
Cujus ortus colitur:

9b. Audi verbum Dei verum:
Inter natos mulierum
Major nullus nascitur.

10 a. O Johannes, prophetarum
Lumen, coeli sidus claram,
Carum pignus gratiae,

10 b. Fac in Christo nos renasci,
Ubi Christus cubat, pasci
In mera meridie,

11. Ubi semper hodie
Et dies laetitiae,