271. De s. Johanne Baptista.

1 a. Laudes decent praecursorem,

Quia nullum se majorem

Surrexisse hominem,

1 b. Testem habet redemptorem,
Qui et meruit honorem
Baptizandi Dominum.

2 a. Angelo praenuntiatus,
In ventre sanctificatus
De sterili nascitur,

2 b. Ne quis hunc tangat reatus,
In eremo sequestratus
Parce nimis pascitur.

3 a. In ventre, mundo, inferno
Prophetavit nos superno
Visitandos lumine,

3 b. In adventu nam materno
Exsultavit pro interno,
Quod praesensit, numine.

4 a. Virgo, martyr, plus propheta,
In quo lex est adimpleta,
Inchoata gratia,

4b. Praeco Christi et athleta,
Fac, ut cursus nostri meta
Sint coeli palatia.