276. De s. Johanne Evangelista.

1. Haec est dies veneranda,
Qua Johannis celebranda
Sunt festiva gaudia:

2 a. Fiat mundus Iactabundus,
Hujus luce Christo duce
Radiat ecclesia.

2 b. Hic est ille tam dilectus,
Qui magistri supra pectus
In coena recubuit,

3 a. Quo doctrinae potat flumen,
Ubi vitae vidit lumen,
Quod nobis perhibuit.

3 b. In amoris hic privilegio
Summi patris conjunctus filio
Super omnes placuit.

4 a. O quam Christus hunc amavit,
Cui matrem commendavit
In mortis angustia.

4b. Virgini committitur,
Virgo dum affligitur
Caro Christi saucia.

5 a. In Johanne ut laudemus
Christum, ejus recitemus
Operum insignia,

5 b. Summi regis ad honorem
Et Johannis in amorem,
Cujus sunt solemnia.

6 a. Margaritas hic contractas
Integravit semel tactas
Crucis per auxilium,

6 b. Coelos prece penetravit,
Dum in aurum transmutavit
Rudes virgas frondium.

7 a. Drusiana suscitatur,
Turba patrum gratulatur
Tanto beneficio,

7 b. Matri vivens natus datur
Et, quae vidit, cuncta fatur
Johannis imperio.

8 a. Viro virus datur dirum,
Sed non laedit virus virum,
Quod hausit intrepidus ;

8 b. Statim duos suscitavit,
Quos ibidem tunc necavit
Ille liquor pessimus.

9 a. In olei servus Dei
Saevo gente saeviente
Pleno missus dolio,

9 b. Nil ardoris, nil fervoris
Sentit ibi, namque sibi
Christus est praesidio.

10 a. Hic dum alta contemplatur,
Per aquilam figuratur,
Sub figura demonstratur
Ejus eminentia.

10 b. Hic in altis immoratur,
Pane coeli satiatur,
Vivi fontis aqua datur
Sibi sancta copia.

11a. Postquam cursum consum-
mavit
Vitae, Christus hunc vocavit
Et vocatum sublimavit
In coelesti solio.

11b. Deum videt Deo gratus,

Solo visu satiatus,
Atque fulget illustratus
Veri solis radio.

12 a. O Johannes, roga Deum.
Funde preces rogans eum,
Ut nos lavet, quos redemit
Et in cruce pendens emit
Pietatis gratia.

12 b. Illud praestet Christus tibi,
Ut nos omnes jungat sibi
Et ad regna pietatis
Nos perducat cum beatis
In aeterna gloria.