279. De s. Johanne Evangelista.

1. Oramus te, aeterna
spes et summa,

2 a. A quo bonitas,
lux et felicitas
et bona manant omnia,

2 b. A quo tempora
et cuncta saecula
certa capiunt spatia.

3 a. Adsis precibus,
quas tibi sonant
plebs tua

in hac pretiosissima
festivitatis die,
terris omnibus lucida,

3 b. In qua meruit
cernere tuam
gloriam

virgo in coelestibus et
evangelista, tuba
Johannes apostolica.

4 a. Qui te in excelsis
habitantem viderat,

4b. Quomodo aquila
soli figens lumina.

5 a. Coeli petivit limina
Et sic inaudita
saeculis praeconia

5 b. Tua salutari
debriatus gratia
Mortalibus infuderat.

6 a. Abhinc ergo tuam,
aeterne Domine,
misericordiam

6b. Obsecramus, ut hanc,
quam ille semitam
nobis ostenderat,

7 a. Et mente devota
et fide sincera

7 b. Sequamur hanc tibi
beneplacitam,

8 a. Et ejus meritis
cernere tuam
jam mereamur patriam.

8 b. Tibi laus et honor,
tibi claritas,
pax sit et omnis gloria.