283. In Decollatione s. Johannis B.

la. Jubilemus omnes una
concordi laetitia,

1b. Celebrantes hodiernae
diei solemnia.

2 a. Concrepet melos sonorum
Et modulis organorum
Plaudat haec ecclesia,

2 b. Cum propheta veritatis
Nequitiis debellatis
Triumphat in gloria.

8 a. Hic est ille, quem dum ventris
Clauderet angustia,

3 b. Christo sensit exsultantem
Mater matri obvia.

4 a. Hic digito designavit
Et mundana baptizavit
Auferentem vitia,

4 b. Nec majorem fudit eo
Conjugalis teste Deo
Copulae fecundia.

5 a. Hic invicta Christi praeco
Numinis industria

5 b. Prohibebat regi moecho
Fraterna conjugia.

6 a. Igitur Herodias
Molitur insidias
Urgente nequitia.

6b. Et angusti carceris

Exsecrator Veneris

Punitur molestia.

7 a. Natale regis aderat
Et ingenti copia

7 b. Galilaeis paraverat
Festiva convivia.

8 a. Dum sumuntur fercula
Saltat meretricula
Meretricis filia,

8 b. Et affectus omnium
Movet discumbentium
Saltantis lascivia.

9 a. Placet regi, dantur ei
Funesta stipendia,

9b. Jugulato vate Dei
Cruentatur curia.

10 a. Declinans perjunum
Intrat homicidium
Caeca temulentia,

10 b. Et atrocis feminae
Fuso sacro sanguine
Sedatur insania.

11a. Sed trinitas Deus alma,
Certantium spes et palma,

11b. Pro mortali virum vita
Muneravit infinita.

12 a. Nunc, Christe, fidelium
Suscipe vota

12 b. Johanni canentium
Mente devota,

13 a. Ut ejusdem gloriae

Consequamur gaudia

13 b. Quam illius hodie

Meruit constantia.

Amen dicant omnia.