291. De sancta Katharina.

la. Gaudeamus sub honore
virginis eximiae,

1b. Katharinae, collaudantes
Christum regem gloriae.

2 a. Qui sic eam decoravit
Inclito martyrio

2 b, Et cum sanctis collocavit
In coeli palatio.

3 a. Sprevit regnum temporale,
Sprevit mundi gaudia,

3 b. Et adhaesit summo regi,
Qui gubernat omnia.

4 a. Virgo sacrata Deo
nullis detereri
potuit verberibus,

4 b. Nec minis ullis neque
verbis emolliri
blandis nec muneribus.

5 a. Neque retrudi timuit
carceris ergastulo,
Quin constanter praedicasset
verbum Dei populo.

5 b. Nec ferientis gladium
judicis pertimuit,
Sed gratanter martyrium
pro Christo sustinuit.

6 a. Maxentium superavit
dei potentia,
Despiciens corporis sui
dira supplicia.

6 b. Cujus fidem ut attendit
atque constantiam,
Decollari praecepit eam
mox per invidiam.

7 a. O beata Katharina,

Quae jam gaudes in superna
Cum coelesti curia,

7 b. Nostri pia miserere

Nunc et semper et tuere
Ab omni tristitia.

8 a. Chorum nostrum tuae laudi
Assistentem tu exaudi
Impetrans coelestia,

8 b. Recolentes tuum festum
Hodiernum quam honestum
Tecum duc ad gaudia.

9 a. Ubi pax est perpetua,
Salus et concordia ;

9 b. Ubi vita fine carens,
vita plena gloria.

10 a. Katharina, sponsa Christi,
Quae tyrannum devicisti
Fidei constantia,

10 b. Fac nos hostem superare,
Sequi Christum et amare
Ipsius vestigia.

11a. Nostras preces exaudire
dignetur omnipotens
pius pater,

11b. Ut te digne collaudare
valeamus jugiter
pia mater.