293. De sancta Katharina.

1 a. Collaudetur Katharina,
Florens rosa sine spina,
Rubens per martyrium;

1b. Haec est virgo gratiosa,
Nata regis, legis glosa,
Dulce coeli gaudium.

2 a. Haec doctores superavit,
Haec cuntos evacuavit
Cultus idolatriae;

2 b. Ob hoc digne virgo pia
A triplici hierarchia
Collaudatur hodie.

3 a. Dum non cedit hostibus,
Resistit erroribus;
Virgo flagellatur,

3 b. A profanis manibus
Caesa scorpionibus,
Mox incarceratur.

4 a. Sed non desunt consolantes
Hanc angeli, ministrantes
Cibum missum coelitus.

4b. Ob hoc credunt incredentes
Multi tot signa videntes
Fieri divinitus.

5 a. Imperator hanc hortatur,
Cui non credens decollatur,
Fluit lac pro sanguine.

5 b. Monte Sina deportatur,
Sepulturae corpus datur
In supremo culmine.

6 a. Felix, per quem gaudia
Tota in ecclesia
Sumens exaltatur,

6 b. Orbem replet semine,
In coelorum agmine
Tandem collocatur.

7 a. Ex illius tumba manat
Oleum, quod cunctos sanat
Divina potentia;

7 b. Caecis visus restauratur,
Salus aegris reparatur,
Laetis cedunt tristia.

8 a. O lumen virginitatis,
Vas decoris, sanctitatis
Flumen indeficiens,

8b. Funde dona pietatis,
Vultu tuae bonitatis
Fideles respiciens.

9 a. Flos in florum areola
Florens, sortis aureola
Gaudens trina,

9 b. Propter tuam clementiam
Nobis impetra gratiam,
Katharina.

10 a. Et post, pia mater bona,
Flos doctorum et matrona
Clericorum omnium,

10 b. Pacem confer sempiternam
Et ad lucem nos supernam
Confer post exsilium.