297. De sancta Katharina.

la. Nato patris sine matre,
Nato matris sine patre
Detur laus et gloria,

1b. Qui felicem et victricem
Ut reginam Katharinam
Coronavit gloria.

2b. Gaudet chorus coelestium

Suo regi psallentium

De tua victoria,

2 b. Ergo gaude, Deo digna,
Et nos tecum, o benigna,
In tui memoria.

3 a. Virgo pia, gloriosa,

Per spiritum Christi sponsa
Et ipsius filia,

3 b. Sed secundum carnem florens,
Stirpe decens, forma recens,
Costi regis filia.

4 a. Tu unica parentibus
Disciplinis scholaribus
Imbuta divinitus,

4 b. Praecipuis exterius
Doctoribus, interius
Dono sancti spiritus.

5 a. Hujus dulcis te perfudit
Et suavis te docuit
In omnibus unctio,

5 b. Qua diffusa in labiis
Larga supervenit tuis
Ejus benedictio.

6 a. Ad certamen animata,
Signo crucis roborata,
Regis fers insignia,

6 b. Oratores superati,

Per te Christi testes facti,
Possident coelestia.

7 a. Post reginam egregium
Regis ducem Porphyrium
Ducentis militibus

7 b. Sociatis conversisti,
Dignos Deo reddidisti
Junctos coeli civibus.

8 a. Hujus sancti praedux facti
Non frustraris, dum precaris
Exorandi spatium,

8b. Post carcerem, post verbera,
Post rotarum supplicia
Vitae tenens bravium.

9 a. Non sanguinem sed lac fundis,

Katharina, virgo dulcis,

De cervice lactea,

9b. Cujus corpus per aera
In verticem montis Siria
Virtus vexit coelica.

10 a. Candidata, purpurata,
Stola legis, lictor regis,
Induit te Dominus.

10 b. Speciosa, generosa,

Haec regina et benigna,
Cujus hic est filius.

11a. Festum tuum celebrantes,
Memoriam venerantes,
Tibi digne famulantes
Floreant virtutibus.

11b. Tua, virgo, prece pia
Consummata carnis via
Sponsi tui cum gloria
Fruamur amplexibus.

12 a. Audi pie congaudentes,
Serva tibi servientes
Et in coelis conviventes
Fac post mortis debitum.

12 b. Tecum cives supernorum
Et concives simus horum
Et consortes gaudiorum
Post carnis interitum.

13 a. Ergo confer pietatis
Lac et donum caritatis,
Opem pete deitatis
Servis summae deitatis,
Da salutis gaudium.

13 b. Ad sanctorum omnes coetum

Nos invitet Deus secum,

Ut cantemus simul tecum

Alleluja, carmen laetum,

Angelorum canticum.