311. De sancto Laurentio.
Die septima.

la. Collaudantes exsultemus,
Ad laudandum praeparemus
Cor, vocem et opera:

1b. Mens laetetur interius,
Vox resultet exterius,
Opus jungat dextera.

2 a. Trino Deo et simplici
Una voce et triplici
Merito laus canitur:

2 b. Sic laudet omnis populus,
Triplex enim funiculus
Difficile rumpitur.

3 a. Pestis avaritiae,
Simul et invidiae
Recedat tristitia,

3 b. Nec tumor superbiae,
Nec fel iracundiae
Nostra turbet gaudia.

4 a. Laurentius hodie
Laudis et laetitiae
Nobis est materia,

4b. Qui stirpis egregiae
Factus est et patriae
Lux, decus et gloria.

5 a. Castam servat juventutem,
Adhuc puer senectutem
Morum gerit in virtutem
De virtute gradiens.

5 b. Christi fragrans in amorem,
Ejus currit in odorem,
Mundi mundus foedum florem
Et sese transsiliens.

6 a. Arcbipraesul ordinatur

Et praesulem imitatur,

Qui corda purificat,

6 b. Vivam, sanctam, innoxium
Deo placentem hostiam
Se totum sacrificat.

7 a. Ad nos Dei clementia
Tam magnus ex Hibernia
Thesaurus dirigitur,

7 b. Non in terra ut loculis
Celatus sed miraculis
Cunctis palam proditur.

8 a. Gaude, plebs Augensium,
Collauda Laurentium
Et ejus auxilium
Incessanter rogita.

8 b. Turbata solatium,
Infirma praesidium,
Ignara consilium
Ejus semper flagita.

9 a. Hunc apella,
Ne procella
Maris te dejiciat,

9 b. Ne sors laeta
Vel quieta

Incautam decipiat.

10 a. Caro premit,
Mundus fremit,

Hostis urget acrius,

10 b. Ne te flectant
Vel innectant,

Vocetur Laurentius.

11a. Sussitator mortuorum,
Reparator oculorum,
Emundator leprosorum,
Preces nostras suscipe.

11b. Qui loquelam reddis mutis,
Membris robur dissolutis,
Nos a jugo servitutis
Gehennalis eripe.

12 a. Quos tua replet gaudio
Corporalis translatio
Simul et praesentia,

12 b. Nos ab hoc nequam saeculo
Sacro precum vehiculo
Transfer ad coelestia.

13. Tuis intentos laudibus
Nos salva sacris precibus
Et ornatos virtutibus
Coetorum junge civibus.