312. De sancto Laurentio.
In Octava.

la. Laeta dies hodierna,
Qua laetatur in superna
Confessor egregius:

1b. Gaudet nutrix Hibeniia,
Sed Augensis ecclesia
Laetatur uberius.

2 a. Felix tellus occidentis,
Quam roravit orientis
Eos de coelo veniens,

2 b. Ex fervore pietatis
Et humore caritatis
Vir processit oriens.

3 a. Regum natus parentela
Meliori sub cautela
Genus suum extulit,

3 b. Dum peccati spreta sorde
Coeli regem toto corde
Regi terrae praetulit.

4 a. Puer vacans disciplinis
Totus erat in divinis
Et Dei servitio,

4b. Et quod de scripturis audit,
Totum firmat, totum claudit
In cordis armario.

5 a. Laurus virens non tabescit
Et pruina non marcescit
Viror uri nescius,

5 b. Sic a lauro derivatus,
Fide firma laureatus.
Vocatur Laurentius.

6 a. Hic expleta juventute
Vir vocatus a virtute
Tulit jugum Domini ;

6 b. Carnem foris macerabat,
Motus pravos refraenabat
Nulli vacans crimini.

7a. Pius, prodens, literatus,
Christi jugum amplexatus,
Ad honorem praesulatus
A cunctis eligitur.

7 b. Tali gaudens sub pastore,
Nunc timore, nunc amore
Ovis errans ab errore
Ad gregem reducitur.

8 a. Ne lateret sub mensura
Caecis lumen redditura
Lux exstingui nescia,

8 b. Candelabro sublimatur,
Dono cujus illustratur
Augensis ecclesia.

9 a. Nam per ejus sanctitatem
Dat infirmis sanitatem
Dei miseratio,

9 b. Lepram vestit munda cutis,
Usus linguae datur mutis
Praesulis suffragio.

10 a. Caecis visus reformatur,
Claudis gressus reparatur,
Fugantur daemonia;

10b. Redditur vita defunctis,
Aegris salus datur cunctis
In fide non devia.

11a. Praesal Christi venerande,
Vitae nobis viam pande,
Ne nos premat jugum grande
Carnis vel molestia.

11b. Qui tranquillas fluctus maris,
Navigantes consolaris
Tua nobis in amaris
Sint praesto suffragia.