319. De sancto Ludovico.

1 a. Clarum sidus gloriae,
Decus regni Franciae
Nobis fulsit coelitus,

1b. Nam triumphat hodie
Per arma justitiae
Ludovicus inclitus.

2 a. Dives sine macula,
Laudandus per saecula
Fecit mirabilia.

2 b. Aromatum nebula,

Quam spirant miracula,
Repletur ecclesia.

3 a. Salomoni similis,
Nam Deo amabilis
Fuit et pacificus.

3b. Justus, prudens, dapsilis,
Pius, mundus, humilis,
Moribus angelicus.

4 a. Jam candor munditiae
Et odor fragrantiae
Lilii convallium

4 b. Attestantur proprie
Ludovici gloriae

Et clamant praeconium.

5 a. Beate Ludovice,
Pio vultu respice
Vota supplicantium

5 b. Et sortis angelicae
Nos consortes effice
Post praesens exsilium.