322. De sancto Mammete.

1. Voce, corde jubilemus
Jubilantes exsultemus
Solemni laetitia.

2 a. Et laus Christi decantetur
Et beati celebretur
Mammetis victoria,

2b. Qui spe certa confirmatus
Non expavit cruciatus
Nec mundi supplicia.

3 a. Puer adhuc duodennis
Non humanae sed perennis

Vitae quaerens gaudia,
Ne colantur idola,
Hortatur Christicola

Ratione praevia.

3 b. Fervens zelo caritatis,
Rebus suis erogatis

Oppressus inopia,
Christum Deum praedicat,
Quem signis magnificat,

Et virtutum gratia.

4 a. Quod ut novit dux profanus,
In hunc sanctum jecit manus
Ducis inclementia.

4b. Dumque sanctus sic tenetur,
Nomen Christi confitetur
Constanti fiducia.

5 a. Martyr enim firmae mentis
Exsultabat in tormentis
Dans Christo praeconia,

5b. Sed tyrannus debachatur,
Quando sibi nuntiatur
Certantis constantia.

6 a. Ergo sibi praesentatum
Donis mulcet dignitatum
Praetendens insignia:

6 b. Nunc minatur, nunc blanditur,
Sed vir sanctus invenitur
Invictus per omnia.

7 a. A parentum disciplinis
Neque prece neque minis
Tyranni vesania

7b. Illum valet amovere,

Neque possunt hunc terrere
Tam dura flagitia.

8 a. Devorandus feris datur,
Sed in agnum commutatur
Ferarum saevitia;

3 b. Haec submissa pedes lambit,
Haec amplexu collum ambit,
Pia dans obsequia.

9 a. Inde sancto, quae parantur,
Circa corpus applicantur
Lampadum incendia,

9b. Sed per illa nec doloris
Ulla signa nec ardoris
Apparent vestigia.

10a. Videns judex nec tormentis
Hunc nec flecti blandimentis,
Nec a fide suae mentis
Mutari constantiam,

10 b. Fornax jubet incendatur,
In qua martyr comburatur,
Sed nec per hanc molestatur
Nec sentit angustiam.

11 a. Deo namque protectore
Nullo laesus est ardore,
Nec in veste nec in ore
Visa est combustio.

11b. Ignis enim contra morem
Rorem spirat non ardorem,
Christi juvat bellatorem
Angelorum concio.

12 a. Pretiosa Christi rosa,
Pio regi nos praesenta,
Per quem poenas et tormenta
Devicisti, martyr Christi,
Christo placens hostia.

12b. Ut te duce vera luce
Mereamur collocari
Et cum sanctis epulari,
Ubi datur, quod optatur,
Vita, pax et gloria.