324. De sancta Margareta.

la. Virginalis gaude chorus,
Quem virilis nondum thorus
Casto laesit gremio,

1b. Pro consorte Margareta,
Trinitatis cui secreta
Jam relucet unio.

2 a. Carne munda conservata
Summo nupsit illibata
Sponso Dei filio,

2b. In quo semper delectatur
Et ubique comitatur
Intacto vestigio.

3 a. Stirpe clara procreata
Est nutrici commendata
Educanda studio,

3 b. Gregem cujus fovens pastu
A praefecto pleno fastu
Cupitur Olybrio.

4 a. Formae vultus collaetatur,
Nomen, genus sciscitatur
Optans hanc conjugio;

4 b. Christum, inquit, adamavi,
Sacro cujus subjugavi
Totam me dominio.

5 a. Multis hanc blanditiis
Praeses et divitiis
Immutare studuit,
Nullo tamen potuit
Suavi colloquio.

5 b. Raptus ergo furia,
Moxque Sion filia
Carcere recluditur,
Occurrat, praecipitur,
Diis sacrificio.

6 a. Cultum sprevit idolorum
Nec se vano promissorum
Credidit impendio,

6 b. Illi spondet thura dare,
Quem tremiscunt tellus, mare
Et quaevis plasmatio.

7 a. Flagro mox pectineo
Caeditur, equuleo
Datur pro supplicio;

7 b. Virgulis atteritur
Saevis et affligitur
Lampadis incendio.

8 a. Aqua pleno mergitur,
Nihil tamen laeditur,
Margareta dolio,

8 b. Draco vorat, scinditur,
Illi dum conceditur
Inimici visio.

9 a. Triumphalis agonista
Patienter ferens ista
Vitae pro stipendio,

9 b. Mortis ejus recolentes
Ut immunes decedentes,
Orat, sint a vitio.

10 a. Ensis tandem dominatur,
Judicis dum aspernatur
Dirigi consilio,

10 b. Caput ejus amputatur,
Lictor coelo collocatur
Virginis suffragio.

11a. O beata Margareta,
Angelorum quia leta
Te suscepit legio,

1b. Tuis caris placa Deum
Et ne labi sinas reum
Perenni dispendio.

12 a. Opem praebe desperatis
Et languore praegravatis
Mortis in confinio,

12 b. De hac vita dum vocamur,
Fac, ut ibi perfruamur
Sempiterno gaudio.