325. De sancta Margareta.

1 a. Laus tibi sit, Christe,
fili Dei unigenite,

1b. Cum patre qui regnas
in unitate paracliti.

2 a. Quem agnum sequuntur
agmina virginum,
quocunque ieris,

2b. Nomen tuum et patris
frontibus in suis
scriptum habentia.

3 a. Inter quas haec virgo Gaudet
virginitatis lilio,

3b. Et rubet roseo vultu,
rubicunda martyrio.

4 a. Nomen cujus tractum est
ab evangelica margarita,

4b. Quam inventam venditis
omnibus emit negotiator.

5 a. Haec tua,

Christe, speciosa
tecum delectatur
in hortis aromatum

5 b. Et tuum

ingressa thalamum
tuae visionis
gratia delectatur.

6 a. Quam pro nostris excessibus
apud te semper
intercedere poscimus,

6b. Ut mundati criminibus
aeternam mortem
per te vincere possimus.

7a. Et illuc ejus merita
nos levent ad alta,
quos mala nostra
trahunt ad portam
infernalem.

7 b. Et ipsa duce praevia
vestibus in albis
te mereamur
sequi per portam
aeternalem.

8 a. Ergo Christe, rex aeterne
Domine,

memor in nobis
tuae sis margaritae,

8 b. In cujus jucunditatis
lilio

coelestis aulae
concinit symphonia.

9. Laus tibi, Christe Domine.