329. De sancto Matthaeo.

1. Laudes creatori

canamus digne summo,

2 a. Qui nos ipsius militis
venerari
dederat festa Matthaei,

2 b. Omnis quem colit fidelis
in quadrati
cardine pie saeculi.

3 a. Hunc olim

Ezechiel praevidit
in bis binis
animalibus praeclarum.

3 b. Johannes

denuo videns ipsum

esse clamat

in effigie hominis.

4 a. Quia post, sancta
voce vocatus
Domini
de quaestibus telonei,

4 b. Interesse
apostolico
meruit
ordini et senatui.

5a. Quem ditatum
duplo nomine
sancta canit ecclesia

5 b. Apostoli,
evangelistae ;
sit gloria Christo lausque.

6a. Quem Christus

trina fide sancto spirituque
repletum

6 b. Ad partes

miserat Aethiopiae pius
docendae.

7 a. Hic coeperat vir sanctus
spargere verbum Dei,
populum baptizare
atque docere,

7 b. Daemones effugare
magosque superare,
caecos illuminare,
claudos sanare.

8 a. Mortuis vivere

mutisque loquelam dederat,

8 b. Vocibus privatas

aures recluserat potenter.

9a. Accidit interim,
ut natus regis
vitam finiret
morte captus atra,

9 b. Quem suis precibus
suscitat, patrem
ejus matremque
baptizando simul.

10 a. Qui post multa
miracula
interemptus obiit,

10 b. Jam cum suo
perenniter
regnaturus magistro.

11. Miles Christi,
memento nostri.