340. De sanato Martino.

1a. Laetabundus

Exsultet fidelis chorus,
Alleluja.

1b. Gratuletur

Ad sancti Martini laudes
Et praeconia.

2 a. Pauperi compatiens
Adhuc catechuminus
Miseretur,

2 b. Nudum palla vestiens.
Qua vestitum Dominus
Se fatetur.

3 a. Non protectus clipeo
Vult hostili cuneo
Obviare,

3 b. Signum crucis praevium
Assumens praesidium
Singulare.

4 a. Fontem sitit dogmatis,
Lavacro baptismatis
Renovatus

4b. Delet idolatrias
Purgatque spurcitias
Et reatus.

5 a. Obstat crucis hostibus,
Imperat daemonibus,
Medetur languoribus
Dans levamen.

5 b. Dum Deo sacrificat,
Globus ignis indicat,
Quod eum purificat
Sacrum flamen.

6a. Hic fidem adstruit,
Et quos mors tenuit,
Vitae precibus
restituit.

6 b. Cives angelici
Laude multiplici
Defuncto plaudunt
pontifici.