348. De sancto Mauro.

la. Adest dies veneranda,
Dies inelis decoranda
Et camoenis dulcibus,

1b. In hac die pulset caelos
Concordatum dulce melos
Vita, voce, moribus.

2 a. Haec est dies semper grata,
Patris Mauri consecrata
Dulci patrocinio,

2 b. Plaudat ergo noster chorus,

Totus laetus et decorus

Concordi tripudio.

3 a. Sanctus enim Dei Maurus,
Quem victorem mundi laurus
Coronat in specie,

3 b. Deponendo carnis molem
Clarum sidus supra solem
Felix scandit hodie.

4 a. Christus nos jubet videre,
Maurus semper vidit vere
Ab adolescentia,

4 b. Dum cognovit, malum cavit,
Et virtutes adamavit
Atque sprevit vitia.

5 a. Puer enim duodennis,
Quo fit dies hic solennis
Coepit Deum colere,

5b. Benedictus timens Deum
Nutrit atque docet eum
Semper recte vivere.

6 a. Christus jubet vigilare,
Vigilasti, pater Maure,
Cum ingenti studio,

6 b. Raro somnum capiebas,
Stans aut sedens dormiebas
Indutus cilicio.

7 a. Benedicti vivens more
Fame corpus et algore
Edomabas nimio:

7b. Nos orare Christus monet,
Hic priusquam signum sonet,
Est in oratorio.

8 a. De virtute in virtutem
Crescens Maurus domat cutem,
Obedit spiritui,

8 b. Amat Deum et veretur,
Patri carus hinc habetur,
Atque fratrum coetui.

9 a. Ordinatus hic levita,
Ut magister vixit ita.
Fecit et miracula:

9b. Benedicto fit sodalis
Et adjutor nullus talis
Jam erit in saecula.

10 a. Patris jussu Benedicti
Super aquas more Petri
Currens traxit Placidum:

10 b. Sic, qui fide non nutavit,
Super flumen ambulavit
Sicco pede liquidum.

11a. Caeco nato lumen praebet,
Grates reddit hic, ut debet,
Et Deum glorificat:

11b. Plures Maurus a languore
Benedicti sanat more,
Tres defunctos suscitat.

12 a. Invocemus ergo Maurum,
Ut de lacu vitiorum
Prece nos eripiat ;

12b. Curre, pater, et festina,
Ad te trahe, ne sentina
Baratri nos recipiat.

13 a. Tibi, pater, assistentes

Semper serva congaudentes
Tuo patrocinio,

13b. Ut post mortem in sanctorum
Mereamur electorum
Adjungi consortio.