359. De ss. Nereo et Achilleo.

1a. Celebremus victoriam
Nerei et Achillei,
Quos ad perennem gloriam
Provexit ardor fidei.

1 b. Hi Domitillae virginis

Conservabant cubiculum,
Cultores veri numinis
Et puritatis speculum.

2 a. Tincti fonte baptismatis
Per Petri ministerium,
Puellae sacrae dogmatis
Impendunt magisterium.

2 b. Horum salubri monitu

Rugam cavens et maculam
Toto refutat spiritu

Mortalis sponsi copulam.

3 a. Clementis sacris manibus
Tecta sacro velamine,
Totis flagrat visceribus
Audito Christi nomine.

3 b. Aurelianus igitur

Domitillam prosequitur,
Punire jam deliberat,

Quam prius desponsaverat.

4 a. Succensus irae stimulis
Ad Pontianam insulam
Cum duobus vernaculis
Christi relegat famulum.

4b. Ibi Priscus et Furius,

Simonis magi complices,
Avertebant attentius
A sana fide simplices.

.5 a. Refragantur mendacio
Nereus et Acbilleus,
Veritatis praeconio
Sermo cedit erroneus.

5 b. Torquetur in equuleo

Nereus cum Achilleo,
Nec extorquet Christicolis
Lictor, ut litent idolis.

6a. Caesi flammis sunt traditi
Praecisisque capitibus
Suo junguntur capiti,

Quod regnat in coelestibus.

6 b. Horum juvemur meritis
Ac prece saluberrima,
Ut in compage capitis
Membra simus vel ultima.

7. Nos Domitilla Flavia
Pari juvet instantia,
Quae viris par victoria,
Pari congaudet gloria.