366. De sancto Nicolao.

la. Nicolaum confessorem
Lauda pium et pastorem,
Militans ecclesia,

1b. Tanto patri jubilare,
Dulces bymnos personare
Decet cum laetitia.

2 a. Magnum signum sanctitatis
Et futurae castitatis
Praebuit infantia,

2b. Quae se statim abstinebat
Semel tantum lac sugebat
Quarta, sexta feria.

3 a. Hic renitens sublimatur,
Laus insignis ei datur
Et honor divinitus,

3 b. Praesul cum efficitur
Et dignus ostenditur
Voce missa coelitus.

4 a. O quam felix et praeclara,
Quantum summo regi cara
Talis est promotio,

4 b. Quam non favor hominis
Dat nec amor culminis
Sed vera devotio.

5 a. Hic ad thronum praesulatus
Tamquam Aaron est vocatus
A Deo feliciter,

5 b. Tanto gradu non elatus
Mitis clemens, cunctis gratus
Vixerat humiliter.

6 a. Fulsit ut sol Dei templo,
Verbo docens et exemplo
Fidem Christi populo,

6 b. Vita sua sic doctrina
Quasi stella matutina.
Lucet omni saeculo.

7 a. Tunc prudenter vigilavit
Et talentum dispensavit
Creditum fideliter,

7 b. Cum pudorem conservavit
Virginum, quas clam ditavit
Cum parente largiter.

8 a. Dei cultum ampliare,
Sacra loca frequentare
Devote studuerat,

8 b. Idola destruxit vana

Nec non fraudes, quas Diana
Machinata fuerat.

9 a. Quod naturae denegatur,
Hoc vir sanctus operatur
Singulari gratia,

9 b. Qui frumentum augmentavit,
Quod a multis postulavit
Famis in penuria.

10 a. Ac adjuvit navigantes
Piis votis implorantes
Ejus patrocinia,

10b. Mox tempestas est sedata,
Visa dulcis aura grata
Suaque praesentia.

11a. A paganis puer captus,
Alter undis maris raptus,
Jugulatus puer aptus
Ternus a daemonio;

11b. Cunctis istis suffragatur
Et imago verberatur,
Plagas monstrat et minatur
Furti fit redditio.

12 a. Ligno fracto fraus probatur,
Aurum cernens baptizatur
Judaeus, cum suscitatur
Defunctus in bivio.

12 b. Innocentes liberati
Daemones et effugati
Caeci, claudi sunt curati
Sacro stillicidio.

13 a. Nicolae, lux justorum,

Forma gregis, norma moram,
Pro salute devotorum
Funde preces famulorum
In coelesti patria.

13 b. Ora patrem atque natum
Utriusque sacrum flatum,
Ut per tuum deprecatum
Nobis finem det beatum
Et aeterna gaudia.