371. De s. Oswaldo Episcopo,

1. Laudes regi
Christo jucundas

2 a. Aurea coeli
castra victricia
bis bina orbis
dicant per climata.

2b. Natus de matre
virgine regia,
de Davidis stirpe
edita Maria,

3 a. Mortem morte qui sua
stauro pendens
victor perimerat,

3 b. Levavit et barathro
Adae germen
sedes in superas.

4 a. Cujus munere
aurea sidera
intra angelica

4 b. Archipraesulis
anima Oswaldi
albicat inclita.

5 a. Quo vernant mira illa
celsa agmina,

5 b. Cherubim quae dicuntur
atque Seraphim,

6 a. Sanctus, sanctus,
sanctus quorum
vox ab aevo clamitat.

6 b. Hinc te, Christe,
lingua quaeque
pia laude concinat.

7 a. Tantus quia in aula
emicat,
pax, caritas
qua est omnis et gloria,

7 b. Confessor hic niveus
Domini,
miracula
qui post mortem patraverat.

8 a. Unde, rex regum,

te laudant coeli cymbala,

Alleluja gloriae

tuae jugiter clamantia.

8 b. Hinc et pro laude,

quam sibi laeti pandimus,

Archipraesul Oswaldus

te poscat pro hac conciola.

9 a. Nos in pace quo conservet
tua in hac vita
clementia,

9 b. Nobis donet et quandoque
illa sempiterna
coeli regna.