395. De sancto Remigio.

la. Praesuli Remigio
Tota praesens contio
Fervens desiderio
Laudes pangat,

1b. Ipsius obsequio
Consonet intentio,
Et oris confessio
Corda tangat.

2 a. Ave, pater pauperum,
Infra matris uterum
A rectore siderum
Praeelectus.

2b. Tu flos patrum veterum
Ablutorque scelerum,
Comes coeli procerum
Es effectus.

3 a. Ave, gemma praesulum,
Legis ferens oculum,
Mundo vitae pabulum
Contulisti.

3 b. Dum regem, dum populum,
Dum regni piaculum
Per Dei miraculum
Abluisti.

4 a. Ave, custos patriae,
Pacis et justitiae,
Totius munditiae
Imitator.

4 b. Ora regem gloriae,
Quem vides in facie,
Ne obsit familiae
Mali sator.

5 a. O praesul, accelera,
Famulos exonera,
Transferens ad aetbera
Tua prece.

5 b. Dele nostra scelera
In mundique vespera
Salva nos et libera
Atra nece.

896. De sancto Remigio.

la. Venerando

praesuli Remigio.

1b. Psallat fratrum

veneranda contio.

2 a. Psallat corde, psallat ore
Tanto gaudens confessore
Nostra congregatio,

2 b. Nec discordet vox a vita,
Et sic erit exaudita
Vocum modulatio.

3 a. Post vindictam criminum,
Quando culpis hominum
Est destructa Gallia,

3 b. Ad salutem omnium
Beatum Remigium
Concepit Cilinia.

4 a. Hujus vita praesulis
Coepit a cunabulis
Florere miraculis
Et virtutum gratia.

4b. Mater anus concipit,
Sicut Deus praecipit,
Caecus lumen recipit,
Qui praedixit talia.

5 a. Per hunc Deus restauravit,

Quidquid saeva devastavit
Vandalorum furia.

5 b. Per hunc claudis gressus
datur,
Caecis lumen renovatur,
Fugantur daemonia;

6 a. Mira fulgens sanctitate
In Remensi civitate
Sedavit incendia,

6 b. Dum malignos spiritus
Vir fugaret inclitus
Urbis extra moenia.

7 a. Ubi pedem imprimebat,
Planta pedis apparebat,
Testis est ecclesia,

7 b. In qua vena silicis
Ostendit pontificis
Sacrata vestigia.

8 a. Dum in aquis rex sacratis

Mundaretur a peccatis,

Res nova miraculi,

8 b. Vas est missum coelitus
Dono sancti spiritus
Per columbam praesuli.

9 a. Virgo quaedam Tolosana,
Virgo decens sed vesana
Hujus sancti precibus

9 b. Est ab hoste liberata
Et a morte suscitata
Redditur parentibus.

10 a. Ave, gemma sacerdotum,
Galliarum antidotum
Et lumen ecclesiae,

10 b. Ante partum nuntiatus
Et in ventre consecratus
Beatae Ciliniae.

11a. Diadema praesulum,

Decus, honor, speculum,
Flos et gemma Franciae,

11b. Pietatis oculum

Leva super populum
Praesentis ecclesiae.

12 a. Dum in solo hujus mundi
Hostes premunt nos immundi,
Seda mare, placa ventum,
Ne nos mergat in tormentum
Daemonis invidia.

12 b. O confessor summi regis,
Audi preces tui gregis
Et nos mundos a peccatis
Junge regno claritatis,
Ubi pax et gloria.