397. De sancta Restituta.

la. Fulget virtus Gedeonis,
Qui devictis tot personis
Per fractas lagunculas

1b. Christum regem figuravit,
Cum per suas triumphavit
Martyres puellulas.

2 a. Qui pro sua voluntate
Sexu quovis et aetate
Fecit mirabilia,

2 b. Haec infirma cum elegit,
Quasi per fragmenta fregit
Mundi quaeque fortia.

3 a. Ecce Sunanitis David,
In qua Christus maritavit
Rosae candens lilium,

3 b. Indumentis stragulatis
Suae byssum castitatis
Purpurat martyrium.

4 a. Haec est virgo Restituta,
Viva fide speque tuta
Caritatem patiens,

4b. Patiendo poenas fortis,
A qua fugat metum mortis
Virtus indeficiens.

5 a. Sic edocta Christi schola
Soram intrat virgo sola
Ducta sancto spiritu.

5 b. Firmat sexum fragilem
Amor armans pugilem
Urbis in introitu.

6 a. Supra carnem, supra mundum
Sponsum quaerit munda mun-
dum
Candidum et rubicundum
Rubicunda candida.

6 b. Illum habet, illum quaerit,
Cum quo casta est et erit

Et, si mundus extra ferit,
Intus est intrepida.

7 a. Haec succincta castitate,
Loricata veritate,
Galeata caritate,
Tenens scutum fidei,

7 b. Ense verbi pugnatura,
Cum hac currit armatura,
Fortes flectit, frangit dura
Verbi virtus ignei.

8 a. Certat certa praemiari,
Cursum jubet consummari,
Cum jubetur immolari
Hostia ab hostibus.

8 b. Deo patri praesentatur,
Praesentata coronatur,
Ubi nobis mereatur
Vitam suis precibus.

9 a. Istum servat populum
Translatum corpusculum
Pretiosae virginis,

9 b. Quae suos sic instruat,
Ut Christo restituat
Ex vi sui nominis.